विराटनगर, श्रावण १५ गते । विराट याेग सेवा केन्द्र विराटनगरले श्रावण १५ खिर खाने दिनलाई भव्य र सभ्य रूपमा विराटनगर-१४ जतुवामा रहेकाे राम मन्दिरकाे प्रांगणमा खिर खाने कार्यक्रम सम्पन्न गरेका छन् ।
कार्यक्रमका प्रमुख अतिथि विराटनगर-१० का वडा अध्यक्ष अर्जुन गिरीले भने स्वास्थ्यका दृष्टिले पनि खिर पौष्टिक आहार हो। दूधबाट क्याल्सियम, प्रोटिन र विभिन्न पोषक तत्त्व प्राप्त हुन्छन् भने चामलले शरीरलाई आवश्यक ऊर्जा प्रदान गर्छ। त्यसैले वर्षायाममा सन्तुलित रूपमा खिर सेवन गर्नु लाभदायक मानिन्छ।

त्यसै गरि याेग गुरु देव वशिष्ठले भने श्रावण १५ केवल खिर खाने दिन मात्र होइन, पारिवारिक एकता, आपसी सद्भाव, नेपाली संस्कृति र परम्पराको संरक्षण गर्ने अवसर पनि हो।
रामजानकी मन्दिरका अध्यक्ष चन्द्रनन्द यादवले भने धार्मिक मान्यताअनुसार श्रावण महिना भगवान शिवको प्रिय महिना मानिन्छ। यस महिनामा सात्विक भोजन गर्ने, पूजा–आराधना गर्ने तथा दान–पुण्य गर्ने परम्परा रहेको छ। खिरलाई पवित्र, पौष्टिक र शुभ परिकारका रूपमा लिइने भएकाले श्रावण १५ मा यसको विशेष महत्व रहेको विश्वास गरिन्छ।
खिर दिवसको अवसरमा विराट याेग सेवाका महिला याेगीहरूकाे सहयाेगमा खिर, ककरा-मटरकाे अचार र आलु-जिरा फ्रायकाे व्यवस्था गरेका थिए ।

नेपालमा श्रावण १५ लाई परम्परागत रूपमा खिर खाने दिनका रूपमा मनाइन्छ। वर्षायामको हरियाली, नयाँ बालीको सुरुवात र कृषिमा आधारित नेपाली जीवनशैलीसँग यो दिनको विशेष सम्बन्ध छ। यस दिन परिवारका सदस्यहरू एकै ठाउँमा भेला भएर दूध, चामल, चिनी, घ्यू, सुकमेल तथा किसमिस, काजु, बदामजस्ता सामग्री मिसाएर स्वादिष्ट खिर बनाई खाने चलन रहेकाे छ।

व्यस्त जीवनशैलीका बीच परिवारसँग बसेर मिठास बाँड्ने, अग्रजप्रति सम्मान प्रकट गर्ने र आफ्ना सांस्कृतिक मूल्यलाई जगेर्ना गर्ने सन्देश यस दिनले दिन्छ।
यसरी, श्रावण १५ नेपाली मौलिक संस्कृति, धार्मिक आस्था, स्वास्थ्य सचेतना र पारिवारिक एकताको प्रतीकका रूपमा हरेक वर्ष हर्षोल्लासका साथ मनाइँदै आएको छ ।