सप्तरी, पुस ३ गते । ट्याक्टरको ठक्करले मृत्यु भएका बालकको शव परालको थुप्रोमा लुकाएको अवस्थामा फेला परेको छ ।
भएका सप्तरीको तिलाठी कोइलाडी गाउँपालिका वडा नं. ३ सकरपुराका ६ बर्षीय बालक आनन्द मुखिया बिहीबार दिउँसोदेखि बेपत्ता भएको थियो । वेपत्ता भएको मुखियाको शव परालको थुप्रोमा फेला परेको प्रहरीले जनाएको छ ।
घरबाहिर खेल्न निस्केका स्थानीय रोहित मुखियाका छोरा आनन्द वेपत्ता भएका थिए । उनको खोजी गर्ने क्रममा शुक्रबार शव फेला पारिएको सप्तरीका प्रहरी प्रवक्ता भुवनेश्वर साहले बताए ।
‘उनलाई स १ त ७७५२ नम्बरको गाउँकै ट्याक्टरले ठक्कर दिएर मारेको रहेछ’ प्रवक्ता साहले भने, ‘बालकको मृत्यु भएपछि चालकले शव परालको थुप्रोमा गएर लुकाएका रहेछन् ।’
बालकलाई ठक्कर दिने ट्याक्टरका चालक फरार भएका छन् । उनको खोजी भइरहेको प्रहरीले जनाएको छ । बालकको शवलाई पोष्टमार्टमका लागि गजेन्द्रनारायण सिंह अस्पताल ल्याइएको र घटनाका सम्बन्धमा अनुसन्धान भइरहेको प्रहरीको भनाइ छ ।