विराटनगर, कार्तिक २६ गते । प्रतिनिधीसभा र प्रदेशसभा सदस्यको लागि मंसिर ४ गते हुन निर्वाचनमा पार्टीगत आस्था र विचार भन्दा माथि उठेर मतदान गर्नु पर्नेमा एक मतदाताले जोड दिएका छन् ।
सो विचार हो मोरङ सुन्दरहरैंचाकी बुधमाया प्रधानकी उनले भनिन् २०४६ सालको परिवर्तनपछि कतिपटक भोट लाएँ भन्ने ठ्याक्कै याद छैन । तर, सबै निर्वाचनमा उनले कम्युनिष्ट उम्मेदवारलाई भोट लगाइन् । २०६२÷०६३ को परिवर्तनपछि २०६४ मा भएको निर्वाचनमा भने एकपटक प्रधानले माओवादीलाई भोट लगाइन् । त्यसबाहेक उनले हरेक निर्वाचनमा नेकपा एमालेलाई मतदान गरिन् । उनको पारिवारिक पृष्ठभूमि पनि कम्युनिष्ट नै हो । ६३ वर्षीया प्रधानको यसपटक भने मनस्थिति बदलिएको छ । उनले यसपटक फरक पार्टीका नेतालाई भोट हाल्ने निर्णयमा पुगेकी छन् ।
आमा समूहमा समेत आबद्ध रहेकी प्रधान भन्छिन्, ‘पार्टीभन्दा व्यक्ति हेर्नुपर्ने रहेछ, पार्टी हेरेकै कारण मुलुक अगाडि बढ्न नसकेको हो,’ त्यसैले यस पटकको निर्वाचनमा हामी गाउँका धेरैले डा. शेखर कोइरालालाई भोट हाल्ने मनस्थितिमा पुगेको वताइन ।
उनकै शब्दमा कम्युनिष्टहरु विचार र सिद्धान्तभन्दा सुविधाभोगी र व्यक्तिवादी चरित्रबाट ग्रसित भएका छन् । यसअघिको निर्वाचनमा विजयी भएकाहरु फर्किएर एकपटक पनि नआएको उनको दुखेसो छ ।
शेखर कोइरालासित पूर्वेली जनताको थुप्रै आशा र भरोसा भएका कारण जित्नै पर्ने प्रधानको भनाइ छ । उनी भन्छिन् ‘यदि शेखर कोइरालाले पनि जितेर गएपछि जनताका लागि केही गर्नु भएन भने अर्को निर्वाचनमा हामी भोट हाल्दैनौं ।
‘प्रधानजस्तै मनस्थितिमा पुगेका छन् बूढीगंगा गाउँपालिकाका ७२ वर्षीय रुद्रबहादुर कट्वाल । खोटाङबाट बसाइँ सरेर १५ वर्ष अघि झरेका कट्वालले एकपटक कांग्रेसलाई भोट लगाएका छन् । यसबाहेकको निर्वाचनमा कम्युनिष्ट उम्मेदवारलाई मात्रै भोट खसालेको कट्वालको भनाइ छ । अघिल्लो निर्वाचनमा दुई तिहाई नजिकको बहुमत दिँदा पनि एमालेले केही नगरेको उनको दुखेसो छ । यसपटक उनी हाम्राभन्दा राम्रा व्यक्तिलाई जिताउन आग्रह गर्दछन् । ‘शेखरजीमा ठूलो हिम्मत छ भन्ने मैले बुझेको छु’ कटवालले भने, ‘पाँच–पाँच पटक प्रधानमन्त्री भएका शेरबहादुर देउवालाई उहाँले टक्कर दिनु भएको छ । पूर्व अझ मोरङको पहिलाको राजनैतिक शाख फिर्काउन पनि शेखरजीले जित्नु जरुरी छ ।’
बूढीगंगाकै ६६ वर्षीय माणिकचन चौधरीले पनि कोइरालालाई भोट हाल्ने मनस्थितिमा पुगेका छन् । हाल उनी जसपामा आबद्ध छन् । मधेस आन्दोलनअघि उनी नेकपा एमालेका आबद्ध थिए । सबै जातजाति, धर्म र सम्प्रदायका मानिसलाई जोड्ने पार्टी कांग्रेस रहेछ भन्ने निष्कर्षमा उनी पुगेका छन् ।
यसपटक शेखरलाई जिताउने अभियानमा जुटेका छन् । मधेसवादी दलहरु सबै सत्ता र शक्तिको पछाडि लागेकोमा उनको दुखेसो छ ।